Minningarsjóður Ölla hlaut samtals 613.600 kr í styrk úr árlegri góðgerðarsöfnun starfsfólks Creditinfo. Jane María og Andrea Vigdís Elvarsdætur tóku á móti söfnunarfénu sem sendiherrar sjóðsins en þær eru bróðurdætur Ölla.

Undanfarin ár hefur Creditinfo valið að senda ekki út jólakort, en leggja þess í stað starfsfólki fyrirtækisins lið við söfnun sem óskipt er látin renna til verðugs málefnis. Í þetta sinn var Minningarsjóður Ölla fyrir valinu en sjóðurinn hefur um árabil stutt við íþróttaiðkun barna sem ekki eiga kost á því vegna bágrar fjárhagsstöðu foreldra eða umsjónarmanna.

„Við hjá Minningarsjóði Ölla erum ákaflega þakklát Creditinfo og starfsmönnum fyrirtækisins fyrir þennan ómetanlega styrk sem á eftir að veita von hjá mörgum börnum sem minna mega sín. Á tímum heimsfaraldurs þegar íþróttir hafa sennilega aldrei verið eins mikilvægar, veitir stuðningur við sjóðinn honum byr undir báða vængi, vekur á honum athygli og ekki síst athygli þeirra sem á honum þurfa að halda. Öll börn á Íslandi eiga að fá að stunda íþróttir áhyggjulaus og láta drauma sína rætast. Kærar þakkir fyrir okkur,” segir María Rut Reynisdóttir, framkvæmdastjóri Minningarsjóðs Ölla.

Ýmsar leiðir hafa verið farnar við góðgerðarsöfnunina síðastliðin ár en að þessu sinni kom meginþorri söfnunarfésins frá góðgerðarbingói starfsmanna Creditinfo  sem starfsmannafélag Creditinfo stóð fyrir og starfsmenn söfnuðu vinningum fyrir. Fjölmörg fyrirtæki lögðu söfnuninni lið og eru þeim færðar bestu þakkir fyrir þeirra framlag. Að venju lagði svo Creditinfo fram sem mótframlag jafnháa upphæð og safnaðist meðal starfsfólks.

„Minningarsjóður Ölla er einstakt framtak og var mikil samstaða meðal starfsmanna Creditinfo þegar kom að vali á góðgerðarmálefni fyrir þessi jól. Ég vil nota tækifærið og þakka velunnurum okkar fyrir þeirra stuðning en þau fyrirtæki sem við leituðum til með vinninga tóku okkur sérstaklega vel og gerðu okkur kleift að halda góðargerðarbingó sem sómi var að. Ég fyrir hönd okkar hjá Creditinfo óska forsvarsmönnum sjóðsins góðs gengis í þeirra mikilvægum störfum,“ segir Hrefna Sigfinnsdóttir, framkvæmdastjóri Creditinfo.

Á síðasta ári styrkti söfnunin Píeta samtökin og árið áður nutu Einstök börn söfnunarinnar.

Við þökkum samfylgdina á árinu sem er að líða og óskum ykkur gleðilegrar hátíðar, friðar og farsældar á komandi ári.

Um Ölla

Minningarsjóður Ölla er stofnaður til minningar um körfuknattleiksmanninn Örlyg Aron Sturluson sem var ekki lengi að stimpla sig inn sem mesta efni í sögu íslensks körfubolta eftir að hann hóf feril sinn með meistaraflokki Njarðvíkur árið 1997, þá einungis 16 ára gamall. Hann varð undir eins lykilmaður í liðinu sem varð Íslandsmeistari árið 1998.

Eftir frábært tímabil hélt Örlygur út til North Carolina í Bandaríkjunum til þess að stunda nám og spila körfubolta með Charlotte Christian Knights undir stjórn Hall of Fame NBA leikmannsins Bobby Jones sem varð meistari með Philadelpia 76ers árið 1983. Bobby var einnig fyrsti leikmaðurinn í sögunni til þess að fá nafnbótina sjötti maður ársins en hann afrekaði að spila fjóra All Star leiki og var valinn í varnarlið deildarinnar tíu ár í röð.

Eftir árangursríka dvöl í Bandaríkjunum snéri Örlygur heim og hóf aftur að leika með Njarðvík þá orðinn 18 ára gamall. Örlygur spilaði þrjá A-landsleiki og nokkra unglingalandsleiki fyrir tímabilið. Hann var orðinn einn af albestu leikmönnum deildarinnar tímabilið 1999-2000 þegar hann lést af slysförum 16. janúar árið 2000, daginn eftir að hann spilaði Stjörnuleik Körfuknattleikssambands Íslands.

Nánari upplýsingar um Minningarsjóð Ölla er að finna á heimasíðu sjóðsins